Бұл туралы бүгін өңірлік коммуникациялар қызметінде өткен брифингте Түркістан облысының санитариялық-эпидемиологиялық бақылау департаменті басшысының орынбасары Асқар Ысқақов айтты.
Спикердің сөзінше, Түркістан облысында жалпы 23 балаларды сауықтыру нысаны бар. Оның ішінде мемлекеттік нысандар — 11, жеке нысандар — 12. Ал Төлеби ауданындағы «Балдәурен» республикалық балалар сауықтыру орталығы жыл бойы қызмет атқарады. Қалған 22 сауықтыру объектісі маусымдық режимде жұмыс істейді.
– Балаларды жазғы сауықтыру лагерьлерінің қызметі ҚР Денсаулық сақтау министрінің бекіткен бұйрық талаптарына сәйкес ұйымдастырылуы тиіс. Осы ретте сауықтыру қызметін бастау үшін нысан бойынша санитариялық-эпидемиологиялық қорытынды алынуы керек. Биыл өңірде 11 сауықтыру лагері санитариялық-эпидемиологиялық сәйкестігі туралы қорытынды алды. Оның 10-ы өз қызметін бастаған. Ал, Түлкібас ауданындағы «Ерке» және «Машат-Арасан» лагерьлеріне санитариялық қағидалар сақталмауы және зертханалық зерттеу хаттамаларының толық болмауына байланысты дәлелді бас тарту берілген. 5 лагерьге қатысты өтініш тексерілу үстінде. 5 лагерьден СЭҚ алуға өтініш мүлде түспеген, — деді Асқар Бекболатұлы.
Айта кетерлігі, өткен жылы 7 лагерьге ерекше тәртіппен тексеру жүргізілген. Нәтижесінде, лагерьдегі ойын алаңдары мен арық-атыздардың қоқыстары жиналмағандығы, ауызсу режимі талапқа сай болмауы сынды кемшіліктер анықталған. 7 жеке тұлғаға жалпы суммасы 321 615 теңге, 1 заңды тұлғаға 352 245 теңге айыппұл салынған.
Брифинг соңында спикер лагерьлердің сапасына қатысты мерзімі көрсетілмеген бейнежазбалар лагерьді тексеруге негіз бола алмайтындығын ескертті. Ол үшін шағым иесі аудандық басқармаға немесе электрондық үкімет порталы арқылы барлық фактілерді тіркеп, жазбаша арыз қалдыруы тиіс. Бұдан соң департамент тарапынан тиісті органдарға, яғни құқықтық статистика және арнайы есепке алу жөніндегі комитеттің Түркістан облысы бойынша басқармасына тексеру туралы ұсыныс беріледі. Аталған мекеме тексеріс ашуға болатындығы жөнінде рұқсат бергенде ғана тексеріс жүргізіледі.
