Созақ ауданындағы Майтөбе ауылында енді сабын шығаратын цех бар. Жеке кәсіпкер Әлихан Габибуллаұлы бұл кәсіпті екі жыл бұрын бастаған. Бүгінде кәсіпкердің 12 өнімді шығаруға сертификаты бар.
Сондай-ақ, отандық өнім Шымкент, Тараз, Астана, Қызылорда, Ақсукент және тағы басқа аймақтарға жөнелтіліп жатыр. “Lady” брендімен аталатын цехта әзірге үш адам қызмет атқарып, күніне 1500 сабын шығарады.
«Біз шығаратын кір сабын тек кір жуу үшін ғана емес, тұрмыс-тіршілікте де өзіндік пайдасы зор. Біз әр сабынды өсімдік майлары мен малдың іш майын қолдану кезінде оның тұтынушылық қасиеттерін жақсартатын жоғары сапалы арнайы қоспалардан дайындаймыз. Сабын шығаратын станоктарды яғни арнайы аппараттарды да өзіміз жасағанбыз. Бізде кір сабыннан бөлек, сұйық сабын, киімді ағартуға, терезе жууға және ыдыс жууға арналған сұйық сабын, шашқа арналған сұйық сабын өнімдерін шығарамыз», — деді жеке кәсіпкер.
Бүгінде кәсіпкер әр сабынды 110 теңге көлемінде саудалап, тұрақты табыс тауып отыр. Кішігірім өндіріс орны тұрмыстық химия және автохимиямен айналысады. Өнімнің ерекшелігі, шетелден келетін өнімнен әлдеқайда арзан. Бұл кәсіпті бастауға жеке кәсіпкер өз қаражатынан 5-7 миллион аралығында қаражат жұмсаған.
