Кентау қаласына қарасты Хантағы ауылының халқы көпұлтты. 2014 жылы ауылдағы «Серафимович» атты көшенің атауы «Бірлік» болып өзгерді. Қазіргі таңда аталған көшеде қазақ, орыс, шешен, әзірбайжан, татар, еврей ұлтының өкілдері тату-тәтті ғұмыр кешуде.
Түрлі ұлт өкілдерінен құралған көршілер бір-бірімен ағайындай араласып, бауырдай болып кеткен. Ата-бабалары тағдырдың жазуымен осында келіп қоныстанса керек. Содан бері ұрпақтан ұрпақ жалғасып, ауылға түбегейлі орныққан. Туған жері ауылдарын қатты жақсы көреді. Барлығы дерлік, қазақ тілінде сөйлейді. Балалары ауыл мектептерінде білім алса, кейбірінің балалары Отан алдындағы борышын өтеуге кеткен. Ынтымағы мен бірлігі жарасқан көршілер елдің тыныштығы мен халықтың амандығын тілейді.
Ұлтқа бөлінбей ұйыса бірігіп тірлік істеу қашанда берекеге бастайды. Жүздеген ұлт пен ұлыстың басын қосып отырған Қазақстан атты шаңырақта татулық пен бірліктің, береке мен ізгіліктің шырағы маңызды.
Айта кетейік, Хантағы ауылы «Бірлік» көшесінде бүгінде 72 тұрғын үй бар. Көше орталық жылу жүйесіне қосылған. Сондай-ақ көше толық жарықтандырылған және жолдары асфальтталған.
