«AMANAT» партиясы Кентау қалалық филиалының мәжіліс залында Саяси кеңес Бюросының кезекті мәжілісі өтті.
Мәжілістің күн тәртібіне сәйкес, Кентау қалалық жолаушылар көлігі және автомобиль жолдары бөлімінің 2023 жылға жоспарланған жолдарды жөндеу жұмыстары туралы және қалалық білім бөлімінің 2023 жылдың 9 айында атқарылған жұмыстары туралы есептері тыңдалды.
Бірінші кезекте қалалық жолаушылар көлігі және автомобиль жолдары бөлімінің басшысы Ұлан Жамбылұлы баяндама жасап, мәлімет берді.
Кентау қаласында жалпы 173,5 шақырымды құрайтын 258 көше бар. 2022 жылдың қортындысымен жақсы және қанағаттанарлық жағдайдағы жолдардың үлесі 77,3 пайызды құрап, 138,5 шақырым жол асфальтталған болатын. Ал 2023 жылы партияның сайлауалды бағдарламасының Кентау қаласы бойынша Жол картасының индикаторына сәйкес, көрсеткішті жыл соңына дейін 88,2 пайызға жеткізу жоспарланып отыр. Ал, асфальтталған жолдардың ұзындығы 153 шақырымға жетеді.
Мәжілістің алдында филиал жанындағы Партиялық бақылау комиссиясы мүшелері тарапынан Төлеби, Молда Мұса және тағы басқа да көшелерде жол жөндеу жұмыстарына мониторинг жүргізген болатын. Мәжілісте мониторинг жұмыстары барысында анықталған кемшіліктер және Бюро мүшелерінің ұсыныстары негізінде тиісті қаулы қабылданды.
Екінші мәселе бойынша қалалық білім бөлімінің басшысы Ә.Әуелбековтың 9 айда атқарған жұмыстарының есебі тыңдалды. Бүгінгі таңдағы мектептердегі оқушылардың ыстық тамақпен қамтылуы, оқушылардың мектептегі қауіпсіздігін қамтамасыз ету және жылу маусымында қатты, сұйық отынмен, газбен қамтылуына баса назар аудару қажеттігі айтылып, ұсыныстар негізінде тиісті қаулы қабылданып, орындау үшін бөлімге жолданатыны түсіндірілді.
