Түркістан облысында полиция, жергілікті атқарушы органдар мен ауыл тұрғындары бірлесіп, қылмысты болдырмау бағытында нәтижелі жұмыстарды атқаруда. Олай деуімізге себеп, 2022 жылдан бері 10 ауылдық округтен тұратын Ордабасы ауданының 4 ауылында, яғни Төреарық, Жусансай, Аққойлы, Көлтоғанда қылмыс тіркелмеген.
Тұрғындардың айтуынша татулық пен бірліктің арқасында ауыл биін сайлап, арнайы іс-шаралар ұйымдастырып, кішісі үлкенінің тілін алып, бір-бірін құрметтеуі мен ішімдіктің сатылмауы қылмыстың тіркелмеуіне себеп болыпты.
Ауылда бала кезінен тұрып, бүгінде абыз ақсақал атанған Мамед Багиров: «Біз бұл дәрежеге оңай жеткен жоқпыз, учаскелік полиция инспекторларымен бірге рейдке шығудан шаршамаймыз, түнгі уақытта көшеде жүрген жастарды көрсек, ақылымызды айтып, ата-анасына тапсырамыз. Шалыс басқандары болса теріс бұрылмаймыз, қайта олармен жақын сөйлесіп, мәселесін бірге шешеміз.
Қылмыстың басым бөлігі спирттік ішімдіктің салдарынан болатынын естіп жүрміз. Сондықтан ауыл арасында жергілікті атқарушы органдармен бірге іс-шаралар ұйымдастырып, кәсіпкерлермен келісіп, ішімдікті сауда орындарда, дүкендерде, жалпы мүлде сатпау бойынша шешім қабылдағанбыз. Ешкімді ешкім мәжбүрлемейді. Біз бұған өзара бірлесіп ұрпағымыздың болашағы үшін жасап отырмыз. Ішімдік жоқ жерде, береке, татулық пен бірлік бар, — дейді ақсақал.
