Арыс қалалық білім бөлімінің әдістемелік кабинетінің жұмыс жоспарына сәйкес, М.Шаханов атындағы жалпы білім беретін мектебінің модераторлық етуімен «BilimSTARS» зияткерлік жобасының қорытынды кезеңі ұйымдастырылды. Финалдық кезеңге 6 мектеп жолдама алып, жүзден жүйрік шыққан командалар бақ сынасты.
Жобаның мақсаты – оқушылардың пәндер бойынша білімін кеңейту, көшбасшылық қасиетін айқындау. Сондай-ақ оқушылардың ғылымға қызығушылығын арттыру.
Зияткерлік жоба 2 кезеңнен тұрды. Атап айтсақ, «Ғылыми жоба қорғау кезеңі» және «Функционалды сауаттылық тапсырмасы» деп аталады.
Жобаға Арыс қаласының білім бөлімнің әдістемелік кабинет меңгерушісі Г.Молдашева, әдіскерлер Ж.Асылбекова, Д.Ахметжанова, мектептердің директордың бейіндік ісі жөніндегі орынбасарлары, педагогтер мен оқушылар қатысты.
Зияткерлік жобаның қорытынды кезеңіне 26 мектептен 8-10-сынып оқушылары арасынан Үздік атанып, финалдық кезеңге жолдама алған 6 мектеп командасы жан- жақты ғылыми-шығармашылық ізденістерін көрсетіп жүлделі орындарды иеленді. Жүлделі 1-орынды Ә.Жангелдин атындағы жббм командасы қанжығаларына байлады. С.Адамбеков атындағы жббм командасы – екінші, Қаражантақ жббм командасы – үшінші орынды иемденді.
Сайыс соңында жүлделі орын алған және финалға қатысқан мектеп командалары білім бөлімінің дипломы мен қаржылай, бағалы сыйлықтарымен марапатталды.
