«Үздік педагог» байқауының жеңімпаздарымен Оқу-ағарту министрі онлайн кездесті

Елімізде 12 жыл бойы дәстүрлі түрде «Үздік педагог» республикалық байқауы ұйымдастырылып келеді. Бүгінге дейін жалпы саны 624 мұғалім өз мамандығының үздігі болып танылды.
Жақында оқу-ағарту министрі еліміздегі барлық білім басқармаларының өкілдерімен онлайн кездесу өткізді.
Кездесуге Түркістан облысының білім басқармасы басшысының орынбасары Ж.Маханбетов, Білім беруді дамыту орталығының директоры Б.Төлімбет және «Үздік педагог» конкурсының республикалық кезеңінде жеңімпаз атанған облыс педагогтері қатысты. Онлайн жиыннан соң, Орталық басшысы Б.Төлімбет үздік педагогтермен өңірдің Жол картасындағы міндеттерді бірге талқылады.
Еліміздің үздік ұстаздары өз іс-тәжірибелерімен, идеяларымен бөлісті. Сондай-ақ мемлекетке өздеріне сенім артып, педагогикалық қауымға көрсеткен қолдауы үшін алғыс білдірді.
Айта кетейік, «Үздік педагог» республикалық байқауы 2012 жылдан бері өткізіліп келеді. Жыл сайын 64 педагог осы марапатқа ие болады. Әрбір жеңімпазға мемлекеттік қолдау ретінде 1000 АЕК немесе 3 450 000 теңге көлемінде сыйақы беріледі.