Ақтау қаласында спорттық және жауынгерлік самбодан кадеттер, жасөспірімдер, жастар және шеберлер арасында Азия және Океания чемпионаты өткен болатын.
Халықаралық жарысқа 25 елден 500-ге жуық спортшы келіп қатысты. Өз қарсыластарынан оза шыққан кентаулықтар жүлделі орындарға ие болды. Атап айтқанда, Ақбота Қыдырәлі 1 орын, Нұрбек Нұрбаев 2 орын, Адина Абақова мен Нұрхан Жамалхан 3 орынды иеленді.
Жеңімпаз және жүлдегер атанған спортшыларды құттықтау үшін қала әкімі Жандос Тасов бастаған зиялы қауым өкілдері мен спорт жанашырлары Ынтымақ алдаңында жиналып, чемпиондарды қарсы алды. Қаланың мәртебесін көтерген чемпиондарды қала әкімі құттықтап, сый-құрмет көрсетті.
«Азия және Океания чемпионатында намысты қолдан бермей, қала мерейін үстем еткендеріңіз үшін алғыс білдіремін. Алдағы уақытта да додаларда топ жарып, жеңіс тұғырынан көріне береді деп сенемін. Жетістіктерің биіктерге жетуді және өз армандарын жүзеге асыруды армандайтын барлық жас спортшылар үшін жарқын үлгі болсын.Еліміздің атын асқақтатып, Кентау қаласының мерейін үстем еткендеріңіз үшін өз атымнан және де қала халқы атынан алғысымды білдіремін», деді қала әкімі.
