Өткен жылы Кентау қалалық мансап орталығы тарапынан жұмыссыздық деңгейін төмендету мақсатында 5231 адамды жұмыспен қамту жоспары бекітілген болатын. Жыл қорытындысына сәйкес, жұмыссыз болып есепте тұрған азаматтардың ішінен өңірлік жұмыспен қамту картасы аясында 5238 адам уақытша және тұрақты жұмыс орындарымен қамтамасыз етілді.
Бүгінгі таңда Кентау қалалық мансап орталығы филиалында жалпы 29 штат бірлігі бар және 4 бөлім қызмет етеді. Аталған мекеме қызметкерлері жұмыссыз ретінде тіркелген әрбір адамның қолайлы жұмыс жасауына мүмкіндік жасайды. Қалалық мансап орталығының директоры Жақсылық Қайдаулов айтуынша, қазіргі таңда Кентауда жұмыссыздар саны азайып келеді.
— Біздің мекеме жұмысының орындалуы бойынша жеке жеке айтатын болсам, бос жұмыс орындары бойынша жұмыс берушілердің сұранысына сәйкес 2011 азаматты жолдау жоспарланған болатын. Нәтижесінде нақты 2108 азамат тұрақты жұмысқа орналасты. Мемлекет басшысының «10 мың тұрғынға 100 жұмыс орнын ашу» тапсырмасы негізінде жеке бастамалар аясында 1000 жұмыс орнын ашу көзделген еді. Жалпы осы бағыт негізінде Кентау қаласында 1026 жұмыс орны ашылды, — деді ол.
Қала аумағындағы 189 жұмыс беруші мекемеге 1383 азамат уақытша жұмысқа жолданды. Оның ішінде, алғашқы жұмыс орны жобасына 90 адам жіберіліп, жоспар толығымен орындалды. Жастар практикасының жоспары 350 адамға бекітілген болатын. Бүгінде Кентау қаласында 6 орта білім беретін колледж бар. Сол колледждің бітіруші 370 түлегі жастар практикасына жұмысқа жолданды. Әлеуметтік жұмыс орындарына 148 адам жолданды. Қоғамдық жұмыс орнына 670 жұмыссыз жіберілді. «Күміс жас» жобасына 105 адамға жолдама беріліп, жоспар толығымен орындалды.
Жыл басынан субсидияланатын жұмыс орындарын құрған жұмыс берушілерге жолданған қатысушыларға Еңбек кодексі талаптарын сақталуы бойынша Мансап орталығының қызметкерлерін жұмылдыра отырып, мониторинг жұмыстары жүргізілді. Мониторинг нәтижесінде жұмыс орындарында болмаған 150-ден астам азамат жұмыстан шығарылды. Бұл жұмыстар бүгінгі күні әлі де жалғасын табуда. Сонымен қатар, қалада өзінің кәсібін ашамын деген тұрғындарға үлкен қолдау көрсетілуде.
— Жаңа бизнес идеяларды іске асыруға арналған грант бойынша 81 азаматтың бизнес жобасы қаржыландырылды. Санаттары бойынша айта кететін болсам, 27 мүгедектігі бар, 8 атаулы әлеуметтік көмек алушы, 39 көпбалалы, 7 мүгедек бала тәрбиелеп отырған адам түрлі бағыттар негізінде грант алды. Мемлекеттің мақсаты қаржыны беріп қою ғана емес, грант алған азаматтар қаржысын тиімді пайдаланып, өз ісін ашу болып табылады. Бүгінгі таңда грант алған 37 азаматқа мониторинг жұмыстары жүргізілді. Нәтижесінде қаржыны мақсатсыз жұмсаған 7 азаматтың құжаты сотқа жолданды, — деді Жақсылық Қайдаулов.
Одан бөлек, Түркістан облысы әкімдігінің қаулысы негізінде мүгедектігі бар адамдар үшін жұмыс орындары квотасына 17 жұмыс орны белгіленіп, 5 жұмыс беруші мекемеге 17 азамат жұмысқа орналасты. Жалпы еңбекке қабілетті 239 мүгедектігі бар азаматтар жұмыспен қамтылды. Сондай-ақ, пробация есебінде тұрған адамдар үшін жұмыс орындары квотасына 6 азамат жұмысқа орналастырылды. Сондай-ақ, пробация есебінде тұрған азаматтар қатарынан жұмыс іздеуші ретінде тіркелген 16 адам жұмыспен қамтылды. Оның 11 тұрақты және 5 адам қоғамдық жұмысқа орналасты. Жетім балалар үшін жұмыс орындары квотасына 2 азамат жұмысқа орналасып, жоспар толығымен орындалды.
Раушан НАРБЕК
