Халықаралық ғылыми байқаулардың жеңімпазы және жүлдегерлері болған оқушыларға ақшалай сыйақы берілмек. Бұл жайында Мәжіліс депутаты Асхат Аймағамбетов Facebook парақшасында жазды.
— Мәселелерді кезең-кезеңімен шешу – ең тиімді әдістердің бірі. Кейде бір мәселені шешу үшін ұсыныс жасайсың, бірақ ол бірден қолдау таппауы мүмкін. Осындай сәттерде кейбір адамдар беті қайтып, бастамасынан бас тартады. Алайда мәселені қайта-қайта көтеріп, біртіндеп ілгерілетсең, түптің түбінде оны толық шешу мүмкіндігі пайда болады. Мысалы, халықаралық ғылыми байқаулардың жеңімпаздарына университетке түсу үшін грант беру және біржолғы ақшалай сыйақы тағайындау мәселесін біз екі жыл бойы көтердік. Тіпті, ашығын айтқанда, министр болған кезімде тек халықаралық олимпиадалардың жеңімпаздары ғана емес, ғылыми жобалардың да жеңімпаздары осы бұйрық жобасына енгізілген еді. Бірақ Қаржы министрлігі қаражат жетпейді деп қолдамай, сол бұйрықпен тек олимпиада жеңімпаздары қамтылған-ды, — деп атап өтеді ол.
Оның атап өтуінше Парламентте жұмыс жалғасып, тиісті түзетулер әзірленген және Үкіметке бірнеше рет ұсыныс жасалған.
— Алғашқы талпыныстарда қолдау таба алмадық. Одан кейін ұсынысымыз жартылай шешілді: грант бөлу мәселесі мақұлданып, жуырда қабылданған заңға сәйкес, халықаралық ғылыми жобалар байқауларының жеңімпаздары енді ҰБТ тапсырмай-ақ грантқа ие бола алады. Бірақ ақшалай сыйақы жағы тағы қолдау таппады. Осыдан кейін біз ақшалай сыйақы мәселесін қайта-қайта көтердік. Нәтижесінде, міне, ол да шешімін тапты. Біздің комитеттің отырысында халықаралық ғылыми байқаулардың жеңімпаздары мен жүлдегерлеріне, сондай-ақ оларды дайындаған педагогтарға біржолғы ақшалай сыйақы беру туралы түзетулер қабылданды. Енді жалпы отырысқа шығарылады, — деп атап өтеді Асхат Аймағамбетов.
