Түркістан облысында заңсыз жер қойнауын пайдалану мен ауыр жүк көліктерінің құрылыс материалдарын шамадан тыс тасу мәселесі өзекті болып отыр. Осы бағытта облыс әкімі Нұралхан Көшеров аудан, қала әкімдіктеріне мобильді топтар құрып, облыстық полиция департаменті қызметкерлерімен бірлесе заң бұзушылықтарды анықтап, алдын алу жұмыстарын күшейтуді тапсырды.
Бұл мәселе бойынша бүгін облыс әкімінің орынбасары Талғат Қозбековтың төрағалығымен арнайы мәжіліс өткізіліп, жиынға құзырлы органдардың өкілдері мен сала мамандары қатысты. Мәжіліс барысында Түркістан облысындағы заңсыз жер қойнауын пайдалануды болдырмау, сондай-ақ ауыр жүк көліктерінің шамадан тыс жүк артуын тоқтату бағытындағы жұмыстар талқыланды.
Облыс аумағында заңсыз жер қойнауын қазу мен ауыр жүк көліктерінің заңсыз әрекеттері әлі де орын алуда. Мысалы, биылғы 11 шілде күні Сауран ауданында жүргізілген рейд нәтижесінде ауыр жүк көліктерінің заңсыз тасымалын жүргізгені анықталды. Бұл жағдайдың алдын алу үшін Талғат Қозбеков облыстық көліктік бақылау инспекциясына республикалық және облыстық маңызы бар жолдарда тұрақты рейдтер жүргізуді, заңсыз жүк тасымалдарын болдырмау үшін қажетті шаралар қабылдауды тапсырды.
Сонымен қатар, Сауран ауданындағы Шаға ауылдық округі, Шоқтас елді мекені Құрсай өзені бойында үлкен көлемде заңсыз жер қойнауын қазу жұмыстары жүргізілгені белгілі болды. Ауыр жүк көліктерімен заң бұзушылар ұсталып, материалдар облыстық полиция департаментіне жолданды. Құзырлы органдар бұл істі бақылауға алып, заңсыз әрекет жасаған топқа қатысты тиісті шаралар қолданылатын болады.
Осылайша, Түркістан облысында заңсыз әрекеттердің алдын алу, жер қойнауын қорғау және көлік саласында заң бұзушылықтарға тосқауыл қою бағытындағы жұмыстар күн тәртібінде тұр. Өңірде мобилді топтар мен рейдтердің тиімділігін арттыру үшін тиісті шаралар қолға алынуда.



