Келес ауданында биылғы жылы 33,8 шақырым жол жөнделмек. Елді мекендердегі ішкі көшелерді жаңарту жұмыстары кезең-кезеңімен жүзеге асырылып келеді. Қазіргі таңда бірнеше ауылдық округтерде асфальт төсеу және жол негізін дайындау жұмыстары басталған.
Қошқарата ауылдық округіне қарасты Жамбыл елді мекенінде Ш.Тұрсынбаев көшесінің 2,6 шақырымына асфальт төселуде. Бұл жұмыстарды «Сарыағаш Сәулет» ЖШС жүргізіп жатыр. Сонымен қатар, осы округтегі Алғабас, Жаңақоныс және Қарабура ауылдарының 4 көшесіне шағал тас төселіп, асфальттау алдындағы дайындық жүріп жатыр. Аталған көшелердің жалпы ұзындығы шамамен 11 шақырымды құрайды.
Жол құрылысының сапасына ерекше мән беріліп отыр. Жұмыстардың барысы мен орындалу сапасына «СК Құрылыс инжиниринг» және «Ұлттық жол активтері сапасы орталығы» мекемелері тұрақты түрде техникалық бақылау жүргізуде.
Қазіргі таңда Келес ауданындағы автомобиль жолдарының жалпы ұзындығы 1172 шақырымды құрайды. Өткен жылы 2 көше аудандық бюджет есебінен, ал 16 көше «Ауыл – ел бесігі» бағдарламасы аясында жөнделіп, асфальтталған. Соның нәтижесінде, аудан көшелерінің 61 пайыздан астамы жақсы және қанағаттанарлық күйге жетті.
Биыл аталмыш бағдарлама аясында тағы 21 көшеге орташа жөндеу жұмыстары жоспарланған. Оның ішінде Ошақты ауылдық округінің Қоңыртөбе мен Береке елді мекендерінің 4 ішкі көшесіне және Жүзімдік ауылдық округіндегі Жүзімдік ауылының 11 көшесіне шағал тас төселіп, асфальттау жұмыстарына дайындық жүргізіліп жатыр. Бұл көшелердің ұзындығы 17,7 шақырымды құрайды.
Одан бөлек, Абай ауылындағы Жамбыл, Асан Қайғы, Б.Қырғызалиев, Төле би, Ә.Жылқышиев гүлзары мен Т.Рысқұлов көшесінің батыс бөлігінде ағымдағы жөндеу жұмыстары қолға алынбақ.
Аталған жұмыстар толық аяқталған соң, Келес ауданындағы ішкі көшелердің 65 пайыздан астамы жақсы және қанағаттанарлық деңгейге жетеді деп күтілуде.
