Түркістан облысында «Таза Қазақстан» экологиялық акциясы аясында қоршаған ортаны қорғау бағытында жүйелі іс-шаралар жүзеге асуда. Облыстық жергілікті полиция қызметі экологиялық заңнама талаптарының сақталуын бақылау мақсатында рейдтік жұмыстар жүргізіп, нәтижесінде 11 440 құқықбұзушылық дерегін анықтады.
Атап айтқанда, көпшілік пайдаланатын орындарды ластаған 9406 азаматқа және абаттандыру ережелерін бұзған 2034 тұрғынға қатысты әкімшілік шаралар қолданылған.
Мысалы, Отырар ауданы аумағындағы қатты тұрмыстық қалдықтар полигонын тексеру барысында жазық далаға бейберекет төгілген коммуналдық қоқыс анықталды. Бұл жайт бойынша тиісті материалдар жинақталып, заңнамаға сәйкес шара қабылдау үшін Экология департаментіне жолданды.
Айта кетейік, «Таза Қазақстан» акциясының негізгі мақсаты – елді мекендердегі тазалықты қамтамасыз ету, қоршаған ортаны қорғауға бағытталған мәдениетті қалыптастыру, сондай-ақ абаттандыру және көгалдандыру жұмыстарын күшейту болып табылады.
Облыс әкімдігі мен құқық қорғау органдары қоршаған ортаны қорғау және экологиялық тәртіпті сақтау бағытындағы жұмыстарды одан әрі жалғастыра бермек.
