Кентау қаласында жастардың діни сауатын арттыру және теріс ағымдардың ықпалынан сақтандыруға бағытталған іс-шаралар жалғасуда. Соның аясында Жастар ресурстық орталығында діни экстремизм мен радикалды идеологиялардың алдын алу тақырыбында түсіндіру кездесуі өтті.
Жиынға Түркістан облысы дін істері басқармасы «Дін мәселелерін зерттеу орталығы» КММ-нің теолог маманы Б.Абдрахман, «Кентау қалалық Руханият орталығы» КММ-нің теолог маманы Ұ.Құлтай, сондай-ақ орталық қызметкерлері мен белсенді жастар қатысты.
Мамандар дін атын жамылып жүрген жалған ағымдардың қауіпті белгілеріне тоқталып, олардың қоғам мен отбасына тигізетін зардаптарын түсіндірді. Әсіресе, радикалды идеологияның жастардың ой-санасына қалай әсер ететіні нақты мысалдармен айтылды.
— Жат ағымдар ең алдымен жастардың сенімін пайдаланып, оларды жалған уағыздармен арбайды. Сондықтан әрбір жас өз діни білімін тек ресми дереккөздерден алып, кез келген күмәнді жағдайға бейжай қарамауы қажет, – деді теологтар.
Кездесу барысында қатысушыларға арнайы дайындалған үнпарақшалар таратылып, онда дәстүрлі дін мен ұлттық құндылықтар жайында маңызды ақпарат берілді. Сонымен қатар, мамандар жастарды діни сауаттылықты арттыруға, интернеттегі күмәнді мәліметтерге сын көзбен қарауға шақырды.
Жастар да өз тарапынан көкейлеріндегі сұрақтарын қойып, мамандардан нақты жауап алды. Олар мұндай кездесулердің пайдалы екенін, діни экстремизмнің алдын алуда ақпараттық түсіндірудің маңызы зор екенін атап өтті.
Жалпы, Кентауда өткен бұл басқосу жастардың рухани иммунитетін күшейтіп, жат идеологияға қарсы тұрудың нақты жолдарын көрсетуге бағытталды. Алдағы уақытта да Жастар ресурстық орталығында осы бағыттағы кездесулер тұрақты түрде өткізілмек.
