Ордабасы ауданындағы электрлендіру жұмыстары да қарқынды жүзеге асырылуда. Аудандағы 57 елді мекен толық электр қуатымен қамтылған. 2023 жылы бюджет есебінен Шұбарсу ауылында электр желісін тарту құрылысы толығымен аяқталып, 5984 абонент электр желісіне қосылды. Сонымен қатар, 2024 жылы «Ауыл-Ел-бесігі» бағдарламасы аясында Қарақұм, Төрткүл, Қызылжар және Спатаев ауылдарының жаңа құрылыс аумақтарындағы 17 көшеге электр желісі жүргізіліп, трансформатор орнату жұмыстары жасалды. Бұл жұмыстар нәтижесінде 316 абонент электр желісіне қосылды. Темірлан елді мекеніндегі 4 көшеге де электр желісі мен трансформатор орнатылды, бұл 116 абонентке қызмет көрсетуге мүмкіндік берді.
Биылғы жылға жоспарланған шаралар да кең көлемде. Бөген, Елшібек, Төрткүл, Қызылжар, Бадам, Дербес, Ақбұлақ, Мамыр, Ұялыжар, Теспе, Ынтымақ, Қайнар, Темірлан және Шұбар ауылдарында жаңа құрылыс аумақтарына электр желілерін тарту бойынша жобалық-сметалық құжаттамалар әзірленіп, қаржыландыруға облыстық салалық басқармаға ұсынылды. Бұйыртса, 1112 тұрғын сапалы электр қуатына қосылатын болады. Бұл өз кезегінде өңірдің әлеуметтік-экономикалық дамуына елеулі серпін береді.



