Кентау қалалық сотында кадрлық өзгеріс болып, жаңа төраға тағайындалды. Тағайындау рәсіміне Айдос Сұлтанов қатысып, жаңа басшыны қала активіне таныстырды.
Кентау қалалық сотының төрайымы қызметіне Айнұр Сағындықова тағайындалды. Ол бұған дейін сот жүйесінде жауапты қызметтер атқарып, кәсіби тәжірибесі мен ұйымдастырушылық қабілетімен танылған.
Іс-шараға Кентау қаласының әкімі Жандос Тасов, ауыл әкімдері, құқық қорғау органдарының өкілдері, мекеме басшылары мен мемлекеттік қызметшілер қатысты. Жиын барысында облыстық сот төрағасы жаңа төрайымның сот төрелігін жүзеге асыру ісінде үлкен жауапкершілік жүктелетінін атап өтіп, әділдік пен заң үстемдігін қамтамасыз етуде табыс тіледі.
Өз кезегінде Айнұр Сағындықова көрсетілген сенім үшін алғысын білдіріп, сот жұмысында ашықтық пен тиімділікті арттыруды, азаматтардың құқықтары мен заңды мүдделерін қорғауды басты бағыт ретінде айқындайтынын жеткізді. Сондай-ақ ол қоғаммен және мемлекеттік органдармен өзара тығыз байланыс орнатып, сот жүйесіне деген сенімді нығайтуға күш салатынын атап өтті.



