Түркістан облыстық клиникалық ауруханасында омыртқааралық диск жарығын эндоскопиялық тәсілмен алып тастау бойынша алғашқы ота сәтті орындалды. Академик М.Егізбаевты еске алуға арналған халықаралық мастер-класс аясында медицина ғылымдарының докторы, профессор Т.Керімбаев пен Мәскеу қаласындағы Ауырсынуды емдеу институтының нейрохирургі К.Горячева заманауи эндоскопиялық жабдықты қолданып ота жасады.
Эндоскопиялық әдіс — жарақат аз түсіретін технологиялардың бірі. Оның басты артықшылығы — тіндердің минималды жарақаттануы, пациенттің тез сауығуы және жоғары жайлылық деңгейін қамтамасыз етеді. МӘМС аясында жоғары технологиялық қызметтердің қолжетімділігін арттыру — Президент Жолдауында белгіленген маңызды міндеттердің бірі. Бұл бағытта атқарылған жұмыс өңірде көрсетілетін нейрохирургиялық көмектің жаңа деңгейге көтерілгенін айғақтайды. Аурухана мамандары алдағы уақытта эндоскопиялық оталарды тұрақты түрде жасап, науқастарға тиісті ем алуға мүмкіндік беруді көздеп отыр.
