Түркістан музыкалық драма театрында қазақ музыка өнерінің жарқын өкілдері «МузАРТ» музыкалық-драмалық спектаклінің премьерасы өтті. Қойылым халықтың сүйіспеншілігіне ие болған «МузАРТ» тобының 25 жылдық шығармашылық жолына арналды. Спектакльде топтың қалыптасу кезеңі, өнер жолындағы ізденістер мен жетістіктер сахна тілімен көрініс тапты. Қойылым барысында көрерменге кеңінен танымал әндер орындалды. Премьералық көрсетілімге Түркістан облысы әкімінің орынбасары Ертай Алтаев арнайы қатысып, мәдени іс-шараны тамашалады.
Қойылымға арнайы қонақ ретінде «МузАРТ» тобының әншілері Сәкен Майғазиев, Мейрамбек Бесбаев, Кенжебек Жанабілов және Мақсат Базарбаев қатысып, қойылым соңында топтың танымал «Өз елім» әнін шырқады. Айта кетейік, қойылым көрермен тарапынан жылы қабылданып, өнерсүйер қауымның жоғары бағасына ие болды. Спектакль алдағы уақытта театр репертуарына қосылып, көрерменге ұсынылады.
