Түркістан облысында 2025 жылы кезекте тұрған азаматтарға 2 317 пәтер пайдалануға берілді, оның ішінде 176 жалдамалы және 2 138 несиелік пәтер. Сонымен қатар, келесі жылдарға арналған қор ретінде 580 жалдамалы және 842 несиелік пәтер мемлекет меншігіне алынды. Бұл туралы Түркістан облыстық құрылыс басқармасының басшысы Абай Тұрханов БАҚ брифингінде мәлімдеді.
«2026 жылы өңірде тұрғындарды баспанамен қамтамасыз ету жұмыстары жалғасады. Жоспарға сәйкес, 8 тұрғын үйде 810 пәтер пайдалануға беріледі. Қазіргі таңда олардың құрылысын қаржыландыру жұмыстары атқарылуда. 2025 жылы басқарма 183 нысанның құрылысын жүргізуге 118,2 млрд теңге бөлді, оның ішінде 106 нысан пайдалануға беріліп, қалған 77 нысанның құрылысы 2026–2027 жылдары аяқталмақ. Ал 2026 жылы облыс бойынша 89 нысанға 55,9 млрд теңге қаралған», – деді басқарма басшысы.
Сонымен қатар, білім беру саласында 2025 жылы 4 нысан ел игілігіне берілген болса, «Келешек мектептері» жобасы аясында 9 900 оқушыға арналған 16 мектеп ашылды. Денсаулық сақтау саласында Жетісай ауданы Бәйтерек елді мекенінде 25 орындық дәрігерлік амбулатория пайдалануға берілді, ал жеке инвесторлар есебінен Түркістан қаласында оңалту орталығы ашылды.
2026 жылы Мемлекет басшысының тапсырмасына сәйкес, Сарыағаш және Ордабасы аудандарында 2 перинаталдық орталық құрылысын бастау жоспарланып отыр. Мәдениет саласында 2025 жылы 6 нысан ел игілігіне берілген болса, биыл 13 нысан пайдалануға ұсынылады. Спорт саласында өткен жылы 18 нысан пайдалануға берілген, ал 2026 жылы тағы 9 нысанның құрылыс жұмыстары басталады.
