Мемлекет басшысы Қасым-Жомарт Кемелұлы Тоқаев өз Жолдауында транспорттық инфрақұрылымды дамыту, тұрғындарға сапалы қызмет көрсету және аймақтардың әлеуметтік-экономикалық дамуын қамтамасыз ету маңызды міндет ретінде атап өткен болатын. Осы бағыттағы маңызды жобалардың бірі – Сарыағаш қаласындағы «Сарыағаш» теміржол вокзалының жаңғырту жұмыстары.
Аудан әкімі Арман Абдуллаев құрылыс алаңына барып, нысанның қазіргі жағдайымен танысты. Кездесу барысында аудан басшысы мердігер мекеме өкілдеріне құрылыс жұмыстарының сапалы жүргізілуін, барлық кезеңнің заманауи талаптарға сай орындалуын қатаң қадағалау қажеттігін ескертті. Қазіргі таңда вокзалдың іргетасы құйылған, кірпіш қалау және бетон бағаналарын құюға дайындық жұмыстары жүргізілуде.
Құрылыс алаңында қауіпсіздік талаптарының сақталуы мен жұмыс барысының сапасы тиісті сала мамандарының тұрақты бақылауында. Аталған жобаның тапсырыс берушісі – Қазақстан Темір жолы АҚ, ал құрылыс жұмыстарын «Bold Construction Group» ЖШС жүзеге асыруда.
Жоба толық аяқталғаннан кейін теміржол вокзалы заманауи талаптарға сай жаңарып, жолаушыларға ыңғайлы жағдай жасайды. Сонымен қатар, бұл нысан ауданның көлік инфрақұрылымын дамытуға, аймақтың транзиттік әлеуетін арттыруға және жолаушыларға сапалы қызмет көрсетуге айтарлықтай үлес қосатыны сөзсіз.
Сарапшылардың пікірінше, Сарыағаш вокзалының жаңаруы аймақтық экономиканың дамуына оң әсер етіп, өңір тұрғындары үшін қолжетімді және ыңғайлы транспорттық қызметтерді қамтамасыз етуге мүмкіндік береді.
