Түркістан облысындағы Кентау көпсалалы колледжінің студенті халықаралық байқауда жүлделі орын иеленді. Колледждің «Ғимараттар мен құрылыстарды салу және пайдалану» мамандығының 2-курс студенті Рысхан Ақмарал Венгрия астанасы Будапешт қаласында өткен халықаралық жарыста III орын алды.
Байқау «Кескіндеме және сәндік жұмыстар» құзыреттілігі бойынша ұйымдастырылып, халықаралық достық кездесу аясында өтті. Оған Венгрия, Италия, Чехия, Қазақстан және Ұлыбритания елдерінің өкілдері қатысты. Жарыс барысында қатысушылар кәсіби шеберліктерін, шығармашылық қабілеттерін және дайындық деңгейін көрсетті. Рысхан Ақмарал теориялық білімін тәжірибемен ұштастырып, тапсырмаларды сапалы әрі уақытында орындап, сарапшылардың жоғары бағасына ие болды.
Айта кетейік, Ақмарал бұған дейін Түркістан облыстық чемпионатында осы құзыреттілік бойынша I орын алып, республикалық кезеңге жолдама алған еді. Сонымен қатар ол – «WorldSkills Kazakhstan – 2025» республикалық чемпионатының алтын медаль иегері және «RegionSkills 2024-2025» чемпионаттарының жеңімпазы. Қазіргі уақытта студент «WorldSkills Shanghai – 2026» халықаралық чемпионатына дайындық үстінде.
