Келес ауданы, Ұшқын ауылының тұрғыны Малика Мұхтарова ауылдық жерде шағын сүт өнімдерін өңдеу ісін дамытып отыр. Ол ауылдардан сүт жинап, тәулігіне шамамен 500 литр сүттен өнімдер дайындайды. Шаруа сүттен айран, қаймақ, сары май, құрт және ірімшік сияқты дәстүрлі сүт өнімдерін өндіреді. Осы еңбегінің арқасында ай сайын 500 мың теңгеден астам табыс тауып отыр.
«Біздің өнімді ауыл тұрғындары мен көрші аудандардағы азаматтар тұтынады. Барлық өнімді таза әрі сапалы дайындауға ерекше мән береміз. Қазіргі таңда кәсіпорында төрт техника бар. Өнімдер аудан базарына, көрші аудандарға және Шымкент, Алматы қалаларына жеткізіледі», – дейді Малика Мұхтарова.
Отбасылық кәсіпке жұбайы Қалдыбай Мұхтаров та үлес қосып келеді. Ол үй ауласында мал бордақылаумен айналысып, 20 бас ірі қара мал бағып отыр. Бордақыланған малдың ет өнімдері аудан базарына шығарылып, жергілікті тұрғындарға ұсынылады. Мұхтаровтар отбасы тек кәсіпкерлікпен ғана емес, берекелі шаңырағымен де үлгі боларлық жанұя. Олар төрт ұл-қыз тәрбиелеп өсірген. Бақытты отбасының бүгінде сегіз немересі бар.
