Бүгінде Президенттің бастамасымен жүзеге асырылып жатқан «Таза Қазақстан» жалпыұлттық экологиялық акциясы аясында еліміздің барлық өңірлерінде табиғатты қорғауға, жасыл аймақтарды көбейтуге және тұрғындарға қолайлы орта қалыптастыруға бағытталған ауқымды жобалар қолға алынуда.
Осындай игі бастамалардың бірі Түркістан қаласында жүзеге асырылуда. Қазіргі таңда Қарашық өзенінің маңында жалпы аумағы 50 гектарды құрайтын «Түркістан» экопаркінің құрылысы қарқынды жүргізіліп жатыр. Жоба қаланың экологиялық ахуалын жақсартумен қатар, тұрғындар мен туристердің демалысын ұйымдастыруға арналған заманауи қоғамдық кеңістік қалыптастыруды көздейді.
Жаңа экопарк Түркістанның жасыл белдеуін кеңейтіп, өңірдің табиғи әлеуетін арттыруға бағытталған маңызды нысандардың бірі болмақ. Қазіргі уақытта құрылыс алаңы толық қоршалып, абаттандыру жұмыстары басталған. Мамандардың мәліметінше, аумаққа алғашқы кезеңде 1000 түп ағаш көшеті отырғызылған.
Алдағы уақытта экопарк аумағын жаппай көгалдандыру жұмыстары жалғасып, мұнда 10 мыңға жуық ағаш отырғызу жоспарланып отыр. Ағаш түрлері өңірдің табиғи-климаттық ерекшеліктеріне сәйкес таңдалған. Атап айтқанда, экопаркке тораңғы, үйеңкі, терек және өрік секілді жергілікті климатқа бейімделген ағаштар егіледі. Бұл жасыл желектер алдағы жылдары саялы демалыс аймағын қалыптастырып қана қоймай, қаланың экологиялық жағдайын жақсартуға да ықпал етеді.
Жоба аясында келушілерге қолайлы жағдай жасауға ерекше көңіл бөлінген. Экопарк аумағында жаяу серуендеуге арналған көпірлер салынып, күн энергиясымен жұмыс істейтін заманауи жарықшамдар орнатылуда. Сонымен қатар, демалушыларға арналған орындықтар, отбасылық демалысқа лайықталған барбекю аймақтары, сәндік тас және ағаш мүсіндер орналастырылады.
Жобаның басты ерекшеліктерінің бірі – барлық инфрақұрылым нысандарының экологиялық талаптарға сай материалдардан жасалуы. Бұл өз кезегінде қоршаған ортаға түсетін салмақты азайтып, табиғи тепе-теңдікті сақтауға мүмкіндік береді.
Экопарктің тартымдылығын арттыру мақсатында мұнда табиғи ортаны жандандыру жұмыстары да қолға алынған. Жуырда демалыс аймағындағы су айдындарына аққулар жіберілді. Мамандардың айтуынша, бұл құстар паркке ерекше көрік беріп, келушілердің қызығушылығын арттыра түседі. Сонымен қатар, табиғат пен адамның үйлесімді байланысын көрсететін ерекше экологиялық кеңістік қалыптастыруға ықпал етеді.
Түркістан қаласында жүзеге асырылып жатқан бұл жоба өңірдің туристік әлеуетін арттыруға да серпін бермек. Болашақта экопарк қала тұрғындары мен қонақтарының сүйікті демалыс орнына айналып, табиғатты қорғау мәдениетін қалыптастыруға, экологиялық тәрбиені насихаттауға және өңірдің жасыл қорын көбейтуге маңызды үлес қосады.
Түйіндей келгенде, «Таза Қазақстан» акциясы аясында қолға алынған мұндай жобалар елді мекендердің көркін арттырып қана қоймай, тұрғындардың өмір сүру сапасын жақсартуға, қоршаған ортаны сақтауға және келер ұрпаққа таза әрі жасыл табиғат қалдыруға бағытталған маңызды қадамдардың бірі болып табылады.
