Мемлекет басшысы Қасым-Жомарт Тоқаев өз Жолдауларында халықтың спортпен шұғылдануына қолайлы жағдай жасау, әсіресе ауылдық жерлерде спорт инфрақұрылымын дамыту маңызды міндеттердің бірі екенін бірнеше рет атап өткен болатын. Бұл бағыттағы жұмыстар бүгінде еліміздің барлық өңірлерінде жүйелі түрде жүзеге асырылуда.
Осы орайда Сауран ауданында тұрғындардың игілігіне бағытталған тағы бір әлеуметтік жоба жүзеге асып, Үшқайық елді мекенінде жаңа футбол және балалар ойын алаңшасы пайдалануға берілді. Ауыл тұрғындары үшін маңызды нысандардың ашылу салтанатына Сауран ауданының әкімі Мақсат Таңғатаров қатысып, жұртшылықты қуанышты оқиғамен құттықтады.
Жоба аясында жалпы аумағы 800 шаршы метрді құрайтын заманауи футбол алаңшасы мен 150 шаршы метрлік балалар ойын алаңы ел игілігіне тапсырылды. Жаңа нысандар ауыл тұрғындарының бос уақытын тиімді ұйымдастыруға, жастар мен жасөспірімдердің спортпен тұрақты айналысуына және балалардың қауіпсіз ортада ойын ойнауына мүмкіндік береді.
Салтанатты іс-шара барысында аудан әкімі бұқаралық спортты дамыту мемлекеттік саясаттың маңызды бағыттарының бірі екенін атап өтті. Оның айтуынша, ауылдық елді мекендерде әлеуметтік және спорттық инфрақұрылымды дамыту жұмыстары алдағы уақытта да жалғасын табады. Сондай-ақ, жастардың дене шынықтырумен және спортпен жүйелі түрде айналысуына жағдай жасау, олардың бос уақытын тиімді ұйымдастыру басты назарда екенін жеткізді.
Жаңа футбол алаңшасы барлық заманауи талаптарға сай жабдықталған. Алаң арнайы қоршаумен қоршалып, сапалы жасанды жабын төселген. Бұл спорт нысанын жылдың әр мезгілінде пайдалануға мүмкіндік береді. Сонымен қатар, кешкі уақытта да жаттығу өткізуге қолайлы жағдай қарастырылған.
Ал, балалар ойын алаңында бүлдіршіндердің қауіпсіз әрі қызықты демалуына арналған түрлі заманауи құрылғылар орнатылған. Ойын кешендері, сырғанақтар мен әткеншектер қауіпсіздік талаптарына толық сәйкес келеді. Алаңның айналасы абаттандырылып, балалардың еркін ойнауына қажетті барлық жағдай жасалған.
Ауыл тұрғындары жаңа нысандардың ашылуын қуанышпен қарсы алып, мемлекет тарапынан көрсетіліп жатқан қолдауға ризашылықтарын білдірді. Олардың пікірінше, мұндай спорттық және ойын алаңдары балалар мен жастардың денсаулығын нығайтып қана қоймай, ауыл тұрғындарының бірлігі мен белсенділігін арттыруға да оң әсер етеді.
