Мемлекет басшысы Қасым-Жомарт Тоқаев мәдениет саласын дамыту мен рухани құндылықтарды дәріптеу мәселесіне ерекше көңіл бөліп келеді. Президент тапсырмасына сәйкес, бүгінде еліміздің барлық өңірлерінде мәдени инфрақұрылымды жаңғырту, ауылдық жерлердегі мәдениет ошақтарының материалдық-техникалық базасын нығайту бағытында жүйелі жұмыстар атқарылуда.
Осы бағыттағы игі бастамалардың бірі Сауран ауданында жүзеге асты. Атап айтқанда, Қарашық ауылдық округіндегі мәдениет үйі күрделі жөндеуден өтіп, ел игілігіне қайта берілді. Нысанның ашылу салтанатына Сауран ауданының әкімі Мақсат Таңғатаров қатысып, мәдениет саласының қызметкерлері мен ауыл тұрғындарын қуанышты оқиғамен құттықтады.
Аудан басшысы өз сөзінде мәдениет саласы қоғамның рухани дамуының негізгі тіректерінің бірі екенін атап өтіп, мәдениет ошақтарын жаңғырту жұмыстары алдағы уақытта да жалғасатынын жеткізді. Сондай-ақ, жаңартылған нысан ауыл тұрғындарының игілігіне қызмет етіп, өңірдің мәдени өмірін жандандыруға елеулі үлес қосатынын айтты.
1970 жылы салынған Қарашық мәдениет үйі бүгінде заман талабына сай қайта жаңғыртылып отыр. Жалпы аумағы 3094 шаршы метрді құрайтын ғимаратта 150 орындық көрермен залы, сахна және түрлі мәдени-шығармашылық бағыттағы жұмыстарды ұйымдастыруға арналған арнайы кабинеттер қарастырылған.
Қазіргі таңда мәдениет үйінде көркемсөз оқу, драма және хор бағытындағы үйірмелер тұрақты жұмыс істейді. Бұл үйірмелерге өнерге қызығушылығы жоғары ауыл жастары мен тұрғындары белсенді қатысып, шығармашылық қабілеттерін шыңдауда. Жаңартылған мәдениет ошағы олардың сапалы білім алып, өнерін дамытуына жаңа мүмкіндіктер ашып отыр.
Мәдениет үйінің күрделі жөндеуден өткізілуі ауыл тұрғындары үшін маңызды оқиға саналады. Заманауи талаптарға сай жабдықталған ғимаратта енді мәдени-көпшілік іс-шаралар, концерттер, кездесулер мен түрлі шығармашылық кештер жоғары деңгейде ұйымдастырылатын болады. Сонымен қатар, ұлттық өнер мен мәдени мұраны насихаттау, жас таланттарды қолдау және олардың шығармашылық әлеуетін дамыту бағытындағы жұмыстарға серпін береді.
Бүгінде ауылдық жерлердегі мәдениет нысандарын жаңғырту тұрғындардың бос уақытын тиімді ұйымдастыруға, рухани-мәдени ортаны қалыптастыруға және қоғамдық белсенділікті арттыруға ықпал етуде. Жаңарған мәдениет ошағы алдағы уақытта ауыл тұрғындарының басын қосатын руханият пен өнердің ордасына айналып, ұлттық құндылықтарды дәріптеу мен мәдени өмірді дамытуға қызмет етпек.
