Түркістан облысының әкімі Нұралхан Көшеровтің Қытай Халық Республикасына жасаған жұмыс сапары аясында әлемдік деңгейдегі жетекші компаниялармен маңызды келіссөздер жүргізіліп, нәтижесінде өңір экономикасына тың серпін беретін жаңа инвестициялық жобалар пулы қалыптасты. Бұл бастамаларды жүзеге асыру мақсатында Түркістан облысы әкімінің орынбасары Қанат Қайыпбек бастаған делегация Қытайдың бірқатар ірі кәсіпорындарын аралап, олардың өндірістік әлеуетімен және жұмыс тәжірибесімен танысты.
Сапардың маңызды бағыттарының бірі – Қытайдағы ең ірі көгалдандыру және сәндік өсімдіктер сауда орталықтарының бірі саналатын «Мулань Ханьбэй» гүлдер, өсімдіктер және ағаштар нарығын зерделеу болды. Делегация кешеннің жұмысымен жан-жақты танысып, аталған тәжірибені Түркістан өңірінде іске асыру мүмкіндіктерін қарастырды.
«Мулань Ханьбэй» кешені Қытайдағы гүл өсіру, сәндік бағбандық және ландшафтық көгалдандыру саласының негізгі сауда алаңдарының бірі болып саналады. Мұнда өндірушілер, тұқымбақтар, ландшафт дизайнерлері, сауда ұйымдары мен сатып алушылар бір орталыққа шоғырланған. Кешен аумағында жүздеген павильон мен жеткізуші жұмыс істейді. Олар қалаларды көгалдандыруға, саябақтар мен демалыс аймақтарын абаттандыруға, тұрғын үй кешендері мен коммерциялық нысандарды сәндеуге арналған өсімдіктер мен қажетті құрал-жабдықтардың кең ауқымды түрлерін ұсынады.
Нарықта сәндік ағаштар, қылқан жапырақты көшеттер, гүлдейтін бақша өсімдіктері, бөлме гүлдері, маусымдық гүлдер, бонсай композициялары, су өсімдіктері, көгал шөптері, бақша декоры, суару жүйелері және көгалдандыруға арналған заманауи техникалар сатылады.
Сапар барысында облыс делегациясы ірі ағаштарды өсіру мен тасымалдаудың тиімді технологияларымен, көшет логистикасын ұйымдастыру тәжірибесімен, өнім сапасын бақылау жүйелерімен және көгалдандыру саласындағы инновациялық шешімдермен танысты.
Әсіресе Түркістан өңірінің климаттық ерекшеліктерін ескере отырып, құрғақ аймақтарға бейімделген сәндік өсімдіктерді өсіру, қалалық ортада жасыл аймақтарды көбейту және көшет шаруашылығын дамыту мәселелері ерекше назарға алынды.
Мамандардың айтуынша, мұндай тәжірибелерді енгізу облыстағы елді мекендерді көгалдандыру жұмыстарын жаңа деңгейге көтеруге мүмкіндік береді. Сонымен қатар жергілікті кәсіпкерлер үшін сәндік өсімдіктер өсіру және ландшафтық дизайн саласында жаңа нарықтар ашылады.
Бұл кешен тек сауда орталығы ғана емес, сонымен бірге халықаралық іскерлік байланыстарды дамытуға арналған маңызды платформа болып табылады. Мұнда тұрақты түрде салалық көрмелер, жаңа өсімдік сорттарының таныстырылымдары, кәсіби форумдар және тәжірибе алмасу кездесулері өткізіледі. Қытайдың көгалдандыру индустриясындағы озық технологияларды өндіріспен, логистикамен және саудамен тиімді ұштастырудың табысты үлгісін көрсетеді.
Түркістан облысының делегациясы мұндай кешендердің жұмыс жүйесін зерделеу арқылы өңірде сәндік бағбандықты дамыту, көшет өндірісін жолға қою, халықаралық серіктестік орнату және көгалдандыру саласының экспорттық әлеуетін арттыру бағытындағы мүмкіндіктерді қарастырды.
Бүгінде Түркістан облысында экологиялық ахуалды жақсарту, жасыл белдеулерді кеңейту және қалалардың көркін арттыру бағытындағы жұмыстар жүйелі түрде жүргізілуде. Осы ретте Қытайдың жетекші кәсіпорындарының тәжірибесін енгізу өңірдің көгалдандыру саласын жаңа сапалық деңгейге көтеруге ықпал етпек.
Қытайдағы «Мулань Ханьбэй» секілді ірі орталықтардың жұмысымен танысу Түркістан облысында заманауи көшет шаруашылықтарын дамытуға, жаңа инвестициялық жобаларды іске асыруға және өңірдің жасыл инфрақұрылымын күшейтуге негіз болады.
Нәтижесінде Түркістан тек тарихи және рухани орталық ретінде ғана емес, сондай-ақ заманауи экологиялық стандарттарға сай жасыл өңір ретінде де дамудың жаңа кезеңіне қадам баспақ.
