Мемлекет басшысы Қасым-Жомарт Тоқаев өз Жолдауларында экономиканы әртараптандыру, өңдеу өнеркәсібін дамыту, инвестиция тарту және жаңа жұмыс орындарын ашу міндеттерін айқындап келеді. Осы бағыттағы жұмыстар Түркістан облысында жүйелі жүзеге асырылып, өңірдің өндірістік әлеуетін арттыруға серпін беруде.
Солардың бірі – Сайрам ауданына қарасты Ақсукент ауылында іске қосылған «WALLI PACK» жауапкершілігі шектеулі серіктестігінің ПЭТ платформаларын өндіретін жаңа зауыты. Инвестициялық құны 600 миллион теңгені құрайтын жоба ауданның өнеркәсіп саласын дамытуға және өңір экономикасын нығайтуға бағытталған.
Түркістан облысының әкімі Нұралхан Көшеровтің инвестициялық жобаларды қолдау және өндіріс орындарын көбейту жөніндегі тапсырмалары аясында жүзеге асқан өндіріс орны заманауи технологиялармен жабдықталған. Кәсіпорын тәулігіне 64 мың дана ПЭТ платформасын өндіруге қауқарлы. Өнімдер ішкі нарыққа шығарылып, отандық өндіріс орындарының сұранысын қамтамасыз етуге бағытталған.
Қазіргі таңда зауытта 20 адам тұрақты жұмыспен қамтылған. Бұл өз кезегінде жаңа жұмыс орындарын ашуға, халықтың табысын арттыруға және ауданның әлеуметтік-экономикалық дамуына оң ықпал етуде.
Кәсіпорында қолданылатын өндірістік жабдықтар мен технологиялардың басым бөлігі Қытай Халық Республикасынан жеткізілген. Сонымен қатар өндірісте пайдаланылатын негізгі шикізат та шетелден импортталады.
Мамандардың айтуынша, аталған кәсіпорын ПЭТ платформаларын өндіру саласындағы еліміздегі маңызды өндіріс орындарының бірі саналады. Жобаның іске асырылуы өңірде өндіріс көлемін ұлғайтуға, импортқа тәуелділікті төмендетуге, отандық өнім өндірісін дамытуға және жаңа инвестициялар тартуға мүмкіндік береді.
Бұл – Сайрам ауданында инвестициялық саясаттың нәтижелі жүзеге асып жатқанын және өндіріс секторын дамыту бағытындағы жұмыстардың нақты жемісін көрсететін маңызды жобалардың бірі.
