Қош келдің, Наурыз!

Ұлыстың ұлы күні Наурыз мейрамы — байырғы заманнан келе жатқан “Көктемгі жаңару” мерекесі екені белгілі. Наурыз — ерте кезден бері тойланып келеді. Бұл мейрам Орта Азия халықтары, соның ішінде қазақ халқының да ұлттық мейрамы.
Ұлыстың ұлы күніне орай Кентау қаласында мерекелік іс-шара өтті. Ш.Қалдаяқов атындағы мәдениет сарайында «Қош келдің, Әз-Наурыз» атты салтанатты жиын өтті. Онда қазақтың салт-дәстүрлері мен ұлттық тағамдары, ұлттық киімдері мен қол-өнер бұйымдары кеңінен насихатталды. Сонымен қатар, этномәдени орталық өкілдері де өз тағамдарын ұсынып, қол өнер бұйымдарын көрмеге қойды.
Іс-шараның өтуіне қалалық ішкі саясат, мәдениет және тілдерді дамыту бөлімі, қоғамдық келісім кеңесінің филиалы, қалалық қазақ тілі қоғамы, этномәдени орталықтар, әжелер алқасы бірлесе атсалысты.


Іс-шара қалалық мәдениет сарайы өнерпаздарының онлайн концертімен жалғасын тапты. Карантин талаптарына сәйкес көпшілік концертті онлайн форматта тамашалады.
«Тәуелсіздіктің — 30 жылдығы» аясында және Ұлыстың Ұлы күні — Наурыз мерекесіне орай «Жастар саябағында» орналасқан футбол алаңшасында 2005-2006 жылдары туылған жасөспірімдер арасында футболдан жарыс өтті.

Жалпы саны 7 командада 100-ден аса спортшы қатысты. Тартысты өткен жарыстың нәтижесі бойынша І орынды — «Кентау», ІІ орынды — «Жасұлан-1», ІІІ орынды — «Жасұлан-2» командалары иеленді.
Сондай-ақ, аталған жарыста үздік ойын көрсеткен спортшылар анықталып, барлығы тиісті дәрежедегі диплом, медаль, кубоктармен марапатталды.