Кентауда 450 орындық мектеп ашылды

Кентауда «Дара жол» мектебі ашылды. Салтанатты шараға қала әкімі аппаратының басшысы Амалбек Өміртай мен қалалық мәслихат хатшысы Талғат Балабиев қатысып, бүлдіршіндерді жаңа оқу жылының басталуымен құттықтады.
Мектеп ғимараты бұрын «Ащысайтүстіметалл» комбинатының кеңсесі болған. Ал, кейінгі тоқырау жылдары 3 қабатты нысан қараусыз қалды. Ал, биылғы жылы жеке кәсіпкер Сембек Әбдірахмановтың қолға алуымен күрделі жөндеу жұмыстары жүргізілді.
— Мектепті «Дара жол» деп атап отырмыз. Себебі мұнда білім алған әрбір баланың жолы дара болуы керек. Білім беру орталығы толығмен қажетті құралдармен жарақтандырылды. Компьютерлік сыныптар, пән кабинеттері бар. Асхана, жатақхана жұмыс істейді. Сапалы білім мен саналы тәрбие беруге барлық мүмкіндігіміз бар – деді Сембек Әбдірахманов.
Салтанатты шарада мектеп құрылтайшысы бірінші сынып оқушыларына білім кілтін табыстады.