Түркістан облысында 80 мыңға жуық партияластарды біріктіретін 244 бастауыш партия ұйымы бар. Олар 17 аумақтық партия филиалдарының жанынан құрылған. Еске салсақ, партияның кезектен тыс ХХІІ Съезінде БПҰ-ның бастамаларын қолдау мақсатында және партия имиджін ілгерілету үшін жергілікті жерлерде жарналардың 20%-ын қайтару тәжірибесі ұсынылған болатын.
Партияның негізі бастауыш партия ұйымдары боп саналатындықтан олардың жұмыстары оңтайландырылды. Бүгінде бұл жоспар Түркістан өңірінде жүзеге асырылды. Алда атқарар жұмыстарды пысықтау мақсатында бүгін «AMANAT» партиясы Түркістан облыстық филиалында мәжіліс өткізілді.
Бейнебайланыс арқылы өткен онлайн-офлайн жиынға облыстық партия филиалының Атқарушы хатшысы Бейсен Тәжібаев, бастауыш партия ұйымы төрағалары, аумақтық партия филиалдарының Атқарушы хатшылары және партия қызметкерлері қатысты. Б.Тәжібаевтың мәлімдеуінше бұл тәжірибе партиялық жобаларды жандандыруға, партия мүшелерінің санын арттыруға және сапалық құрамды нығайтуға септігін тигізеді.
Мәжілісте ол бастауыш партия ұйымдарын қаржыландыруға арналған нұсқаулыққа сәйкес жұмыс жүргізуді және іс-шараларды арнайы критерийлерге сай өткізуді тапсырды. Сондай-ақ орталықтандырылған дерекқор базасында ақпараттарды өзектендіру жұмыстарын күшейту де айтылды.
Съезде қабылданған шешімдердің қатарында «округтік БПҰ» құрып ірілендіру, қоғамдық қабылдау бөлмелерін ашып, халықпен кері байланысты нығайту тапсырмасы бар. Қазіргі таңда Түркістан облысында «Амангелді», «Кентау трансформатор зауыты» және «Түркістан станциясы» бастауыш партия ұйымдарында қоғамдық қабылдау бөлмелері жұмысын бастады. Алдағы уақытта БПҰ төрағаларының белсенділігін және жауапкершілігін арттыру бойынша рейтинг енгізу көзделуде.
Талғат Балабиев,
«Amanat» партиясының мүшесі
