Бүгін жаңадан құрылғалы отырған Ұлытау облысынан киелі Түркістан шаһарына елімізге танымал 72 жастағы жиһанкез Сәрсенбай Қотырашов келіп жетті. «Ұлытауға бардың ба?» деп аталатын қарияның бұл марафоны Ұлытау өңірінен 31 наурыз күні басталған, деп хабарлайды Кентау Ақпарат тілшісі.
Сәрсенбай Қотырашов — Ұлытау ұлттық тарихи-мәдени және табиғи музей-қорығының қызметкері, еңбек ардагері. Ол қарашаға дейін бүкіл елді аралап, қолөнер шеберлерімен кездесуді жоспарлап отыр. Басты мақсаты- Ұлытау ауданының тарихымен және киелі жерлерімен көпшілікті таныстыру.
«Азапты болса да, алға қойған мақсатым жаймен орындалып келеді»,- дейді қария.
Жоспар бойынша, ол күніне 40 шақырым жол жүреді екен.
«Мен бұл марафонға жеті жыл бойы дайындалдым. Менің мақсатым – қолөнер шеберлерімен кездесіп, халықты Ұлытау тарихымен таныстыру. Соның ішінде «Көкмайса» фестивалін насихаттау да бар. Мен Қазақстанның барлық өңірлерін айналып өтуді жоспарлап отырмын. Күні кеше ғана Қызылорда облысынан өтіп, киелі Түркістанға келіп жеттім. Мені күтіп ап, қонақжайлық көрсетіп жатқан баршаңызға алғыс айтамын. Ертең Алла қаласа Шымкентке жолға шығамын»,- дейді жиһанкез.
Қария ары қарай Тараз, Алматы, Талдықорған қалаларына жол тартпақ. Сөйтіп ол Қазақстанның үздік қолөнершілерінің тізімін жасауды жоспарлап отыр екен.
Қоларбасын жанына серік еткен Сәрсенбай қарияны Түркістан облыстық Рухани жаңғыру кеңсесінің қызметкерлері арнайы күтіп алды. Сый-сияпат жасап, сапарына сәттілік тіледі.
ок
