Шымкенттік полицейдің көпірден секірмек болған тұрғынды құтқарған сәті оның бейнежетонына жазылып қалған, деп хабарлайды kentauinfo.kz тілшісі.
895 жаяу бағыттағы Патрульдік полиция полкінің қызмет инспекторларынан жергілікті тұрғын көмек сұраған. Ол Қапал батыр көшесіндегі көпірден белгісіз адамның өз-өзіне қол жұмсамақ болып, көпірдің жақтауында секіргелі тұрғанын көрсетіпті. Аталған жайт бойынша оқиға орнына жеткен тәртіп сақшысы ер адамның көпір жақтауына шығып, секіруге оқталғанын көреді. Жедел әрекет еткен полицейлер тұрғынды сөзге тарта отырып, қауіпсіз жерге шығарып алды.
«Күнделікті жұмысқа келгенде бірінші ойым – қоғам тыныштығын сақтап, адамдардың қауіпсіздігін қамтамасыз ету. Менің осы уақытқа дейінгі қызмет барысымда бұндай жағдай бірінші рет орын алып отыр. Аллаға шүкір, азаматты құтқарып үлгердік, ол дін аман»,-дейді полиция аға лейтенанты Жанболат Тастахов.
Тағы бір айта кетерлігі, жедел басқару орталығының бейнебақылау камералары арқылы азаматтың алдымен жолда жүріп жатқан көліктердің астына түспекші болғаны анықталған. Мән-жайды анықтау үшін өмірімен қош айтыспақ болған азамат Еңбекші ауданы Полиция басқармасына жеткізілді.
