Кентаулық ұстаздар референдумды қолдайтындығын жеткізді

Референдум демократиялық түрлендірудің маңызды элементі екені белгілі. Бұл мемлекет пен қоғам үшін ең маңызды мәселелер бойынша дауыс беруде көрінетін азаматтардың ерік білдіруінің кең ауқымды процесі. Қоғам үшін ең маңызды мәселе Конституциялық өзгерістерді қолдау болып табылады.
Кентаудағы Ю.Гагарин атындағы № 16 мектеп — лицейінде облыстық штаб мүшесі, «Түркістан» медиа — холдингінің директоры Жанахмет Ағыбаев, қалалық штаб төрағасының орынбасары, қалалық мәслихат депутаты, жастар ресурстық орталығының директоры Қанат Бекметов, штаб мүшелері Бейсен Самбетов, Әділбек Қайырбеков, Бақыт Мыңбай, Ерлан Жамал мектеп ұжымымен кездесіп, Конституциялық өзгерістермен толықтырулар бойынша түсіндіру жұмыстарын жүргізді.
Кездесуді штаб мүшесі, «AMANAT» партиясы Кентау қалалық филиалының консультанты Бейсен Дүйсенұлы ашып жүргізіп отырды. Жанахмет Жәнібекұлы ұсынылған Конституциялық өзгерістер мен толықтырулардың бірқатарын айтып өтсе, қалалық штаб төрағасының орынбасары Қанат Абдазизұлы Жолдау аясында жалпы Қазақстанның ұзақ мерзімді дамуын айқындайтын саяси реформалардың 10 басым бағытын бойынша түсіндіріп өтті. Әділбек Қайырбеков, Бақыт Өсербайұлы және Ерлан Бахытжанұлы — референдумның мақсаты саяси, құқықтық жүйемізді жетілдіру, конституциялық реформа жасау екендігіне тоқталды.
Ұлағатты ұстаздар қауымы өз кезегінде Конституциялық өзгерістерді қолдайтындықтарын жеткізді.