Қазығұрт ауданының түркістандағы мәдениет күндері өз мәресіне жетті

Облыс орталығындағы «Керуен сарай» туристік кешенінде 1-3 шілде аралығында Ұлттық домбыра күніне орай Қазығұрт ауданының мәдениет күндері өтті. «Түркінің төрі – түрленген Түркістан» атты үш күндік концерттік бағдарламада Қазығұрт ауданының қолөнер көрмесі, кітап көрмелері, аудандық өлкетану тарихи мұражайының көрмесі, аудан өнерпаздарының Гала-концерті ұйымдастырылды.
Облыс әкімінің бекітілген тапсырмасымен 2022 жылдың 4 наурызынан бастап «Түркістан – Түркі әлемінің жүрегі» атты аудан, қалалардың Түркістан қаласында мәдениет күндері тұрақты түрде өткізіліп келеді. Мәдени іс-шараға Қазығұрт ауданының қоғам қайраткерлері, зиялы қауым өкілдері, өнер таланттары, бұқаралық ақпарат құралдары және қала тұрғындары мен қонақтары қатысты.
Ұлттық домбыра күні қарсаңындағы мерекелік шарада ауданнан шыққан өнер майталмандары, «Өзбек» этно-мәдени орталығы, аудандық мәдениет сарайының әншілері, «Жұлдыздар», «Таңшолпан», «Балауса» халықтық би ансамбльдерінің бишілері мен аудандық, облыстық ән байқауларының жүлдегерлері өнер көрсетіп, көпшілікке көтеріңкі көңіл-күй сыйлады.