Республика аумағында Нәтижелі жұмыспен қамтуды және жаппай кәсіпкерлікті дамытудың «Еңбек» мемлекеттік бағдарламасының іске асу мерзімі аяқталуына байланысты, қаңтар айынан бастап Кәсіпкерлікті дамытудың 2022-2026 жылдарға арналған ұлттық жобасын жүзеге асыру қолға алынды. Ұлттық жоба шеңберінде бірқатар іс-шараны іске асыру көзделуде.
Кәсіпкерлікті дамытуға арналған ұлттық жоба 10 міндетті көздесе, оның 3-еуі халықты жұмыспен қамту ісіне жәрдемдесуге бағытталған. Атап айтар болсақ, жобаның басты мақсаты – азаматтардың өз ісін ашып, дамытуына жағдай жасау, субсидияланатын жұмыс орындарын ұйымдастыру арқылы кәсіпкерлерді қолдау және кәсіпкерлердің қажеттіліктеріне қарай дағдыларды дамыту.
Жаппай кәсіпкерлікті дамытуға негізделген жобаның бірінші міндеті — «Бастау Бизнес» жобасы бойынша кәсіпкерлікке оқыту. Жалпы, алғашқы міндет аясында аудан аумағында «Бастау Бизнес» жобасы бойынша кәсіпкерлікке оқыту жүргізілді. Кәсіпкерлік негіздерінде білім алып, оқуды аяқтаған және бизнес-жоспарын қорғаған азаматтар жеңілдікті шарттармен мемлекеттік гранттар мен микрокредиттер алуда. Сондай-ақ, халықтың әлеуметтік осал топтары қатарындағы азаматтарға да жаңа бизнес-идеяларды іске асыруға шағын несиелер мен гранттар берілуде. Биылғы жылы берілетін қайтарымсыз грант көлемі 400 АЕК, яғни 1,2 млн теңгені құрап отыр. Жаңа бизнес идеялары бар азаматтарға берілетін мүмкіндік артуына байланысты, бүгінде оған қызығушылық танытқандар саны көбеюде.
Былтырғы жылы аталған бағдарлама шеңберінде 38 азамат жеңілдетілген несие алса, жаңа бизнес идеяларын іске асыруға арналған мемлекеттік грант 70 адамға берілді. Бастау бизнес жобасы аясында 202 адам кәсіпкерлік негіздеріне оқуға жолданды.
Ұлттық жобаның екінші міндеті — жұмыс орындарын көбейту. Жастарды жұмыспен қамту мақсатында, «Жастар практикасы», «Алғашқы жұмыс орны», «Ұрпақтар келісімшарты» жобалары іске қосылды.
Бүгінде аудан аумағында 29 жастан аспаған, мамандығы бойынша жұмыс тәжірибесі жоқ, жақында оқуын аяқтаған жастарға келісім-шарт негізінде «Жастар практикасы» бойынша жұмысқа жолдама берілуде. Биылғы жылы жастар жолдама берген мекемеден 12 ай тағылымнан өтіп, тәжірибе жинақтап қана қоймай, ай сайын 90 мың жалақы алады.
Былтырғы жылы «Жастар практикасы» бойынша 191 жас түлек 62 мекемеде тәжірибеден өтті. Қоғамдық жұмыстар қала және ауылдық елді мекендерде абаттандыру, көгалдандыру және тазалық жұмыстарын ұйымдастыру ісіне 1058 азамат тартылды.
