Өртенген базар орнында болып, facebook желісі арқылы тікелей эфирге шыққан Сәкен Қалқаманов қазіргі таңда жүргізіліп жатқан жұмыстардың барысымен таныстырды.
«Жетісайдағы базарда қарқынды жұмыс басталды. Жүк көліктері жеткілікті. Қажетті техника екі ауданнан жұмылдырылды. Бір-екі күнде өрт қалдықтарының барлығы тазаланады. Параллельді түрді жаңа базардың эскиздік проектісі жасалып жатыр. Алдағы уақытта заманауи жаңа базар салынады. Онда зардап шеккен сатушылар жайғасады және олардан 1 жыл бойы орынды жалға алу ақысы алынбайды» — деді ол.
Сондай-ақ, кәсіпкерлердің шығынын өтеп беру мақсатында «Түркістан» Корпоративтік әлеуметтік даму қоры ашылғандығын жеткізді.
«Үлкен шығындарды өтеп беру ісінің жалғыз жолы бар. Жекеменшік мүлік болған соң заң бойынша бюджеттен қаржы қарай алмаймыз. Сондықтан қорды жарияладық. Қазір сол қор арқылы қаржы жиналуда. Сондай-ақ, біз базардың иелерінен үлкен соманы жабуды талап етіп отырмыз» — деді Сәкен Қалқаманов.
Қазіргі кезде оқиға орнында өрт қалдықтарын тазалау жұмыстары тәулік бойы жүріп жатыр. Қызыл жалыннан зақым келген 900 шаршы метр жерді жылдам реттеу үшін 6 секторға бөлінді. Әр секторда Жетісайға жақын орналасқан Мақтаарал, Сарыағаш, Келес, Шардара, Жетісай, Қазығұрт аудандарынан келетін құрылысшылар жұмыс істейді. Құрылыс жұмыстары 1 айда толық бітеді деп жоспарланып отыр.
Айта кетейік, Жетісайдағы «Күлпаршын» базарынан өрт шығып, базардағы сауда қатарларының тығыз орналасқан жері, маталар мен киім кешектер, тұрмысқа қажетті заттар сататын аумағы отқа оранған болатын.
Өрт салдарынан 450-ге жуық кәсіпкердің заттары толығымен жанып кетті.
