Кентау қаласында «Жыл үздіктері» марапатталды

Кентау қаласы Ш.Қалдаяқов атындағы мәдениет сарайында «Жыл үздігі-2022» атанған азаматтарды марапаттау іс-шарасы өтті. Салтанатты жиында қала әкімі Жандос Тасов өз салалары бойынша үздік атанып, еңбегімен танылған әр саланың өкілдерін құттықтады.
– Кентау – өндірісті қала. Қаланың қала болып қалыптасуына кенші ардагерлеріміздің үлесі орасан зор екенін білесіздер. Енді әсем қаламызды ары қарай дамыту – сіз бен біздің қолымызда. Сіздер секілді еңбекқор көшбасшылармен бірге қаламыздың жаңа дәуірін, Жаңа Қазақстанмен дамытамыз деп сенім білдіре аламын. Барша бүгінгі еңбек адамдарына алғыс білдіремін. Марапаттарыңыз құтты болсын! Тәуелсіздігіміз тұғырлы, бақытымыз баянды болсын! – деді Жандос Тасов.
Қала басшысы жылдың үздік белсенділері мен қоғамдық бірлестіктердің жетекшілерін марапаттап құрмет көрсетті.
Жиында қалалық мәслихаттың хатшысы Талғат Балабиев жыл үздіктерін құттықтады. Жалпы 18 аталым бойынша үздіктер құрметке бөленді.
Қаламызды дамуына түрлі салада еселі еңбек еткен еңбек адамдарының мерейі тасыған кеште қаланың өнерпаздары концерттік бағдарламасын ұсынды. Еткен еңбектің бағаланып, құрметке бөленген сәттеріне қуанған көпшілік ризашылықтарын білдірді.