Облыс аумағындағы 831 елді мекеннің 815-і орталықтандырылған электр желісімен қамтылған. Қалған шалғайдағы 16 елдімекен дербес электр қондырғыларын пайдалануда. Биыл 40 нысанның құрылысын аяқтап, 47 елді мекендегі 122,3 мың тұрғынды сапалы электр қуатымен қамту көзделіп отыр. Орайы келгенде Бәйдібек ауданында осы бағытта атқарылып жатқан жұмыстардың барысына тоқтала кетуді жөн көріп отырмыз. Ауданда электр жүйесі теңгерімінде 1091,75 шақырым әуе желілері (613,724шқ-10кВ, 478,026шқ-0,4кВ), 21 332 дана бағана және 317 дана (қуаты 35 106 кВа) қосалқы трансформатор бар.
«Оңтүстік Жарық Транзит» ЖШС-гі тарапынан 2010-2022 жылдарға арналған инвестициялық бағдарламасына сәйкес, жөндеу жұмыстары кезең-кезеңімен жүзеге асырылды. Мәселен, былтыр Шаян, Бірлік, Ақбастау, Боралдай, Қаратас, Жиенқұм, Түйетас, Шыбыт, Бәйдібек ата, Таңатар елді мекені тұрғындарын сапалы электр энергиясымен қамтамасыз ету мақсатында тиісті жұмыстар жүргізілді.
Енді аудан аумағында орналасқан 28 елді мекендегі 53 көше бойындағы 1445 үйді сапалы электр энергиясымен қамтамасыз етуге 2021-2022 жылдар аралығында аудандық бюджеттен 4,7 млн. теңге бөлінді. Соның нәтижесінде аталған елді мекендерде электр желілерін тартып, бағаналар орнатылды. Оның жобалық сметалық құжатын «НурАлем-Саулет» ЖШС-і әзірледі. ЖСҚ құны-1 185 648,0 мың теңге. Ағымдағы жылы жоспарланған жұмыстарды ары қарай жалғастыру үшін облыстық бюджетке қаржыландыруға ұсынылып отыр.
