Сайрамдық шаруа Икрамжан Розақұлов 20 жылдан бері алма өсірумен айналысып келеді. Алғашқыда 70 сотық жерге алма көшеттерін отырғызған ол мол өнім алып, шет елге дейін экспорттаған. Кейіннен бау-бақшаны 2 гектарға ұлғайтып, түрлі алма көшеттерін отырғызды. Оннан астам алманың сортын егіп, шағын шаруашылықты үлкен алма баққа айналдырды. Қазір шаруаның бау бақшасында алма ағаштары жайқалып өсіп тұр. Жыл сайын 60-70 тоннаға жуық өнім алып, сатылымға шығаруда.
«Жыл сайын шетелге экспорттап, мол табыс табатынбыз. Соңғы екі жыл көлемінде елде орнаған карантин саудамызды төмендетіп жіберді. Биыл да мол өнім жиналды. Дегенмен, алушы аз» — дейді шаруа.
Бүгінде Икрамжан Розақұлов алма ағаштарын будандастырып, бір түпке 5 түрлі алма өсіріп отыр. Яғни, бір тамырдан шыққан ағашта голден, делишес, вейнсеп, стар кримсон, мелба, бес жұлдұз атты алма сорттары өсіп тұр. Қазір голден мен делишес өнім берген. Ал, қалған үш сорттың өнімі енді жиналады.
«Мен өзім Ташкентке барып үш ай оқып келдім. Сондағы шаруалардың қасында жүріп тәжірибе жинадым. Қазір бар үйренгенімді өз бау-бақшама қолданып келемін. Сондай-ақ, көмек сұраушыларға үйретіп жатырмын. Жуырда Шымкенттегі бір шаруаның үйінде болып, ондағы бір түпке 10 түрлі алманың көшетін отырғызып бердім. Оның 5,6 түрі ғана өніп, өнім беруі мүмкін» — дейді шаруа.
