Түркістан облысының құрылғанына 5 жыл толуына орай, Түркістан облысы Төтенше жағдайлар департаменті мемлекеттік емес өртке қарсы қызметтер арасында өрт-құтқару спорты бойынша жарыс ұйымдастырды. Мұндай жарыс облыс деңгейінде алғаш рет өткізіліп отыр. Жарыстың негізгі мақсаты — облыс аумағындағы өрт сөндіру бөлімшелерінің жауынгерлік дайындығын әзірлікте ұстау және өзара іс-қимыл әрекеттерін пысықтау.
Жарыс облыстық Департаменттің «Өрт сөндіру және авариялық-құтқару жұмыстары қызметі (Түркістан қаласы)» мемлекеттік мекемесінің Түркістан қаласындағы № 39 мамандандырылған өрт сөндіру бөлімінің ауласында өткізілді. Жарысқа қатысушы командалар өрт-құтқару спортының суды бере отырып күштер мен құралдарды өрістету, дабыл бойынша жиналу, үш иінді сатымен көтерілу сынды кезеңдерден бақ сынады.
Жалпы ойынға 6 команда қатысып, нәтижесінде 1-орынды «Комплекс Услуг Безопасности Астана» командасы, 2-орынды «АзияТехПожСервис» ЖШС, 3-орын «Волковгеология» АҚ жеңіске жетті. Жүлділі орынға ие болған командаларға арнайы диплом мен кубоктар және бағалы сыйлықтар табысталды.
