Кентау қаласының әкімі Жандос Тасовтың төрағалығымен өткен жиналыста қалалық құрылыс және сәулет бөлімінің жыл басынан бері атқарған жұмыстары тыңдалды. Бөлім басшысы О.Тындыбаев атқарылып жатқан жұмыстармен және алдағы уақытта жүзеге асатын жобаларды атап өтіп, кең көлемде мәлімет берді.
Бүгінгі таңда Шұғыла мөлтек ауданының №6, №7, №8 көшелеріне инженерлік-инфрақұрылым жүргізіліп жатыр. Жол салынып, сумен қамту, газбен жабдықтау, электр желілерін орнату істері атқарылуда. Сонымен қатар, Ш.Уалиханов көшесі №133 мекенжайдан 1500 орындық және Шұғыла мөлтек ауданындағы Әбілхайырхан көшесі №170 мекенжайдан 1500 орындық мектеп салу бойынша жұмыстар жүзеге асып жатыр. Қазіргі таңда нысандардың жобалау-сметалық құжаттамасын әзірлеуге мемлекеттік сатып алу конкурсы жарияланған.
Қарнақ ауылында 300 орындық мәдениет үйінің құрылысына “Ауыл-Ел бесігі” бағдарламасы аясында бюджеттік өтінім жолданған. Сондай-ақ, жаңадан бой көтеретін дене шынықтыру-сауықтыру кешенінің құрылысына жобалық-сметалық құжаттама әзірленуде.
«Кентау қаласында 1800 га жерге егжей-тегжейлі жоспарлар әзірлеу, Қарнақ, Хантағы ауылының бас жоспарына өзгеріс енгізу, қала аумағындағы абаттандыру жұмыстарына эскиздік жобалар жасау жұмыстары жоспарланып отыр» — деді, бөлім басшысы өз баяндамасында.
Қала әкімі Жандос Қалмұрзаұлы бөлім басшысы мен бөлім қызметкерлеріне қаладағы әрбір құрылыс нысандарын бақылауда ұстап, қала келбетіне өзгеріс енгізетін жобалар ұсынуды тапсырды. Сондай-ақ, қала әкімдігі аппараты мамандарының бақылау жүргізу барысында жасалған сын-ескертпелер бойынша да бірқатар тапсырмалар жүктеді.
