Кентаулықтар Алаш арыстарын еске алды

31 мамыр — Саяси қуғын-сүргін құрбандарын еске алу күні Кентауда кең көлемде аталып өтті. Алаштың арысы атанған Сұлтанбек Қожановтың ескерткіші жанына жиналған көпшілік әсерлі естеліктерімен бөлісті.
Іс-шараға С.Қожановтың туыстары, қалалық маслихат депутаттары, зиялы қауым өкілдері, ұстаздар мен қала жастары қатысты.
«Тәуелсіз қазақ елінің жарқын болашағы үшін құрбан болған ата-бабаларымыздың әруағы мен өршіл рухына бүгінгі ұрпақ атынан бас иіп, тағзым етеміз» — деді қала басшысы Жандос Тасов.
Ал, қалалық мәслихат төрағасы Қаблан Елеусізов 31 мамыр күнінің маңызы жайында айтты.
«Аға буынның тәлкекке толы тағдыры біздің жадымызда мәңгілікке сақталады. Бұл біз үшін аса маңызды тарихи сабақ және біз оны әрдайым есімізде сақтауға тиіспіз» — деді ол.
Іс-шараға Алаштың арысы С.Қожановтың туыстары да қатысты. Атасымен аттас, немере інісі Сұлтанбек Қожанов әкесі мен атасы жайында естеліктерін айтты.
Көпшілік Сталиндік саясаттың құрбаны болған арыстарды еске алып, рухтарына құран бағыштады. Сондай-ақ, ескерткішке гүл шоқтарын қойды.