Кендауда дүниежүзілік денсаулық күніне орай «Денсаулық баршаға» атты мерекелік іс-шара өтті.
Салтанатты шарада қала әкімінің орынбасары Ақнұр Байболова өңірдің медицина қызметкерлері мен ардагерлерін, салтанатты кештің құрметті қонақтарын ҚР медицина қызметкерлері күнімен құттықтады.
«Адам өмірін ұзартуға септігін тигізіп, ажалдан арашалаушы дәрігер мамандығын халқымыз ежелден қастерлеп, құрметтеген. Бүгінгі таңда қазақстандықтардың денсаулығын жақсарту – еліміздің мемлекеттік саясатының басым бағыттарының бірі. Осы жолда жасаған ерен еңбектеріңізге, шипалы алақандарыңыз бен мейірімді жүректеріңізге алғысым шексіз. Сіздерді төл мерекелеріңізбен құттықтай отырып, отбасыларыңызға амандық, дендеріңізге саулық тілеймін! Кәсіби біліктеріңіздің арқасында биік асулардан көріне беріңіздер » — деді Ақнұр Нұралықызы.
Салтанатты шарада ақ халатты абзал жандарға «Халық жанашыры», «Денсаулық сақтау саласының үздігі», «Үздік маман», «Мейірімді медбике» төсбелгілері табысталды. Сондай-ақ, қала әкімінің «Алғыс» хатымен марапатталды.
