Кентаулық оқушылар дауылды желдің қатты соғып, ауа-райының өзгеруіне байланысты онлайн оқуға мәжбүр болды. Жалпы өңірде 4 мамырға қараған түннен орын алған дауылды жел салдарынан бірқатар нысандардың шатыры ұшып, қаланың жарық жүйелеріне зақым келіп, барлық мектептерде сабақтар онлайн форматқа ауыстырылды.
Әзірге қалада сағатына 30 км/с аса соққан жел тоқтамай тұр. Салдарынан білім ошақтары сабақтарын онлайн форматта өткізеді. Синоптиктер жауылды желдің 5 мамыр күні де жылдамдығы күшейіп, күн райы бұзылады деп болжауда.
Қазіргі таңда Кентау қаласында 1420 абонент жарықсыз қалды. «Оңтүстік Жарық Транзит» ЖШС мамандары жөндеу-қалпына келтіру жұмыстарын жүргізіп жатыр. Қатты желдің әсерінен Кентау қаласында мектеп пен «Қазақтелеком» мекемесінің және қазақ-неміс политехникалық колледжінің жатақхана шатыры ұшып кеткен. Ал, ол сол маңайда орналасқан жеке тұрғын үйлерге зақым келтірілген. Абырой болғанда адам шығыны жоқ. Дауылды жел тоқтаған бойда арнайы комиссия зақым келтірілген аймақтардың шығын көлемін анықтайтын болады.
Әзірге сала мамандары қалада қатты желдің қарқынынан құлаған талдарды тазарту жұмыстары жүргізуде.



