Бүгін Түркістан облысына 5 жыл толуына орай «Фараб» әмбебап ғылыми кітапханасында облыстық Мәдениет және туризм басқармасының қолдауымен «Бес жылдыққа – бес әдеби сапар» атты рухани-мәдени іс-шарасы қорытындыланды.
Рухани құндылығы мол шарада Түркістан облысы әкімінің орынбасары Бейсен Тәжібаев өңір кітапханашыларымен кездесіп, олардың ұсыныс-пікірлерін тыңдады.
«Кітап — бұл білімнің қайнар көзі. Білім мен мәдениеттің биік белестеріне жетелейтін тәрбиелік құрал. Өздеріңізге мәлім, биыл Мемлекет басшысы Қасым-Жомарт Тоқаев ауыл жұртына айрықша қолдау көрсету керектігін атап өтті. Бұл орайда, жыл басында өңірімізде «Ауыл кітапханаларына 20 мың кітап» акциясы аясында «Бес жылдыққа — бес әдеби сапар» жобасы бастау алды. Аталған шара Түркістан облысының руханият, әдебиет және мәдениет саласында болып жатқан жаңалықтарымен бөлісу, өңір тарихымен өзге облыс тұрғындарын жете таныстыру мақсатында ұйымдастырылды. Түпкі идеясы кітап оқуға бағытталған акцияға жас ұрпақтың келешегін ойлаған азаматтар зор үлестерін қосты», — деді Бейсен Дәулетұлы.
Жиында облыстық «Фараб» әмбебап ғылыми кітапханасының директоры Жанат Шардарбекова «Ауыл кітапханаларына 20 мың кітап» акциясы аясында белгіленген межеден асып, жалпы 26 мың кітап жиналғанын атап өтті. Сондай-ақ әдеби сапар шеңберінде «Киелі Түркістаннан — Шежірелі Таразға», «Киелі Түркістаннан — Арайлы, әсем Алматыға», «Рухани Түркістаннан – Елордаға», «Тарихи Түркістаннан — Қасиетті Қызылордаға», «Тұғырлы Түркістаннан — Шұғылалы Шымкентке» атауларымен еліміздің бас қалалары мен көршілес жатқан, тарихы тамырлас облыстарға өңірдің әдеби-мәдени жетістігі жан-жақты таныстырылғанын жеткізді.
Бүгінгі қорытынды шара барысында акция аясында жиналған кітаптар өңірдегі 17 аудан-қаланың кітапханаларына салтанатты түрде тарту етілді. Жоспарға сәйкес, әр аудан, қалаға 1500 кітаптан оқу үшін бөліп берілді.
