Түркістан облысында 8 мектеп жаңа оқу жылына дайын емес. Бұл туралы Түркістан облысы білім саласында сапаны қамтамасыз ету департаменті басшысының орынбасары Жанар Қасымова мәлімдеді.
Бүгінде өңірдегі күрделі жөндеу жұмыстары жүргізіліп жатқан 14 мектептің 9-ы тамыз айының соңында пайдалануға беріледі.
Ал, 5 мектепте құрылыс жұмыстары мерзімінде аяқталмауына байланысты, оларда алғашқы қоңырау соғылмауы мүмкін.
Атап айтқанда, Төлеби ауданындағы «Қаратөбе» жалпы орта мектебі, Түлкібас ауданындағы А.Оразбаева атындағы жалпы орта мектебі, Ордабасы ауданындағы Е.Ерназаров атындағы жалпы орта мектебі, Кентау қаласындағы №24 Т.Рысқұлов атындағы жалпы орта мектебі, Төлеби ауданындағы «Қостөбе» мектебі оқушыларды қабылдауға дайын емес.
Сондықтан аталған мектептің оқушылары көрші білім ордаларына тасымалданып оқытылады.
Ал, Сарыағаш ауданындағы №78 жалпы орта мектебі, Қазығұрт ауданындағы №1 жалпы орта мектебі, Төлеби ауданындағы Лашкар Тәжібаев атындағы шағын жинақты жалпы орта мектебі жаңа оқу жылында 5-11 сынып оқушыларын қабылдай алмайды.
Себебі, бұл мектептердің білім беру қызметімен айналысуға лицензиясы немесе лицензияға қосымшасы берілмеген.
«Заңды тұлға ретінде мемлекеттік тіркеуден өткен кезден бастап алты ай ішінде бiлiм беру қызметiмен айналысуға лицензия ала алмаған жағдайда білім беру ұйымы сот тәртібімен таратылады («Білім туралы» ҚРЗ 40-бабы, 2-1 – бөлігі). Департамент тарапынан Әкімшілік құқық бұзу кодексінің 463-бабы 1-бөлігі бойынша хаттама толтырылып, материалдар Сарыағаш, Қазығұрт, Төлеби аудандарының сотына жолданды»,-дейді Жанар Қасымова.
