Қарнақ ауылында ардагер Худайберген Сайдмуратов атында көше бар. Бүгін аталған көшеге ардагердің ұрпақтары арнайы тақтайша орнатты. Ұрпақтары ас беріп, рухына құран бағыштады.
Іс-шараға қатысқан ел ағалары Үмбет Жүсіпбаев, Ергеш Диметов, Базарбай Мұсабеков, Серік Ибадуллаев, Қаблан Елеусізов, Мамыржан Юлдашев, Бекзат Хабибов игі іске ұйытқы болған ардагердің ұлы Толқын Сайдмуратовқа алғыстарын айтты. Ұрпақтар сабақтастығы, үлкенге құрмет көрсету бағытындағы орамды ойларын ортаға салып, ізгі тілектерін білдірді.
Худайберген Сайдмуратов 1906 жылы туылған. Мектепті бітірген соң, Ташкент қаласындағы ұстаздар даярлайтын жоғары оқу орнында білім алды. Елге келген соң, Түркістан қаласы мен Қарнақ, Шорнақ ауылдарында мектеп директоры қызметін атқарды. Түркістан қаласындағы білім бөлімінде абыроймен еңбек етті.
1942 жылы Отан қорғауға аттанып, содан қайтып оралмады. Ел үшін кеудесін оққа тосқан майдангер 1944 жылы Украина жерінде қайтыс болды.
Бүгінде Қарнақ ауылында ардагердің ұрпақтары тұрады. Солардың бірі 85 жастағы ұлы Толқын әкесінің аты берілген көшеге тақтайша жаздарып, орнатты.
