Бүгінде Келес және Шардара аудандарын жалғап жатқан облыстық маңызы бар КХ-72 «Абай-Шардара» автомобиль жолының 39-68 шақырым аралығына орташа жөндеу жұмыстары жүргізіліп жатыр. Бұл Түркістан облыстық жолаушылар көлігі және автомобиль жолдары басқармасының тапсырысымен «Шымкентдорстрой» ӨК» ЖШС мердігер мекемесі тарапынан іске асырылуда.
Бүгінгі таңда, жолдың 68-65 шақырым аралығындағы ескі асфальт қабаты алынып жатыр. Биыл жолдың 3 шақырымы ойылып, тегіс қабатын салу жоспарланған. Нысан 2024 жылға өтпелі. Сонымен қатар, бекітілген сметалық құжаттамаға сәйкес, ойылып-кесілген жерге 2 қабат асфальт жабынын төсеу, жол белгілерін орнату қарастырылған.
Айта кетерлігі, жүргізіліп жатқан жұмыстардың сапасы техникалық қадағалаушы «Оңтүстік жолдары» МКК және «Ұлттық жол активтері сапасы орталығы» РМК тарапынан тұрақты бақылауға алынған.
