«EVROPLIT» цехы — Кентау қаласы Қарнақ ауылындағы тасы өрге домалаған цехтың бірі. 2015 жылы ашылған цех небәрі 15 соттық жерде орналасып-ақ замануи үлгідегі плиткалардың түр-түрін шығарады. Шығарылған өнім негізінен қаладағы кез-келген тұрғын үй-коммуналдық шаруашылығында қолданылады. Бүгінде цехтан тапсырысқа орай 40-қа жуық бұйым жасалады.
Бұдан бөлек цехта облыста кездесе бермейтін евро үлгідегі қоршаулар шығарыла бастады. Оған деген сұраныста артқан. Цех қажетті озық технологиялармен жабдықталған. Онда 60-қа тарта жұмысшы бар.
«Цехтың бас ғимараты Шымкент қаласында орналасқан. Әкемнің ашқан кәсібін филиал ретінде осы ауылдан ашып, жүргізіп келемін. Небәрі 21 жасымда осы цехты қолға алып, ауылдың жігіттерін жұмысқа тарттым. Басында әрине қиындықтар көп болды. Тынымсыз еңбек пен ниеттің арқасында кәсібімді ұлғайттым. Дамыттым» дейді цех директоры Абдулазис Изатуллаев.
Цехтан шығатын өнімге Түркістан облысының барлық аймағынан сұраныстар көп. Алдағы уақытта қосымша цех салып, жұмыс көзін ұлғайтуды көздеп отыр. Сапалы өнімге – сұраныста көп. Мұнда арнайы мамандар күндегі құйылған бұйымдардың сапасын бақылап отырады.
