Түркістан облысы білім беруді дамыту орталығының ұйымдастыруымен Түркістан қаласында өткен «Дарынды балаларға-талантты ұстаз» республикалық педагогикалық олимпиадасының облыстық кезеңіне Сайрам ауданынан қатысқан жас мамандар жүлдемен оралды.
Атап айтсақ, «Green School» жекеменшік мектебінің қазақ тілі мен әдебиеті пәнінің мұғалімі Гүлмира Тузелбаева 2-орын, «Д.Қонаев атындағы ЖОМ» ЖШС-нің бастауыш сынып мұғалімі Анар Ахунова 3-орын және осы мектептің математика пәнінің мұғалімі Дилфуза Мирзатаева «Алғыс хатпен» марапатталды.
Айта кетейік, ауданда 201 білім беру мекемесі жұмыс істейді. Бұл көрсеткіш былтырғымен салыстырғанда 11-ге артық. Жалпы аудандағы 97 мектептің 74-і мемлекеттік болса, 23-і жекеменшік.
2023-2024 жаңа оқу жылында 1-сыныпқа 5924 оқушы (2022 жылы – 6231оқушы) келді. Қазіргі таңда аудандағы мектептерде 64 990 оқушы білім алуда. Сала мамандарының мәлімдеуінше, бұл көрсеткіш былтырғы жылғымен салыстырғанда 1584 оқушыға артық. Оқушыларға 7 962 мұғалім дәріс береді. Олардың 7 398-і мемлекеттік мектептерде, 564-і жекеменшік мектептерде жұмыс істейді. Педагогтердің 99 пайызы (7882) жоғары білімді. 7201 мұғалім жаңа форматта біліктілігін арттырған.
Былтырғы жылдың 8 айында 9 мектеп басшысы ротацияланды. 5 мектеп басшысы ауыстыру тәртібімен басқа мектепке ауыстырылды. Қазіргі таңда мерзімсіз келісім шартпен 14 мектеп директорлары жұмыс істеуде.
